Autobiografi e shkurtër

Në dokumentet zyrtare figuroj i lindur në 5.03.1945. Dita dhe muaji është i saktë ndërsa viti jo. Mbaj mend shumë mirë si nga Nëna dhe Teze Zonja dhe Bejeja që të tria motrat kishin lindur djem brenda 3-4 muajve (Durim Zhupa dhe Fadil Bezhani). Meqenëse ata i kishin më të sakta dokumentet del që edhe unë te jem i datëlindjes 1947. Shkollën fillore e bëra në Fterrë, klasën e pestë e fillova për disa muaj në Çorraj, pastaj në Vlorë tek Rakipi në Shkollën Nr.1. Klasën e 6 dhe të 7 në shtëpinë e fëmijës Vlorë me gjysmë burse i ndihmuar dhe nga Safet Kofina që ishte drejtor. Nga viti 1961 – 1965 mbarova Shkollën Ushtarake Skënderbej në Tiranë dhe në vitin 1967 Shkollën e Bashkuar të Oficerëve në degën e radiolokacionit. Nga viti 1967 – 1977 punova si specialist në profilin tim në Cërrik, njëkohësisht mbarova dhe shkollën e mesme në degën elektrike dhe të radios (natën), fillova vitin e parë të degës matematikë-fizikë (pa shkëputje nga puna), por për mungesë studentësh u mbyll në vitin e dytë. Gjatë kësaj periudhe kam bërë specializim të ngushtë (3 vjet) me kinezët ku arrita të komunikoj me ta në të folur. Kjo më ndihmoi shumë që kur fillova tregtinë të lidhem dhe të punoj me një kinez. Në Cërrik mora shtëpi, erdhi dhe Nëna nga fshati (mbasi u shit shtëpia në Fterrë). Në 13.12.1970 bëra ceremoninë e martesës në Vlorë, me Nazmien. Më 24.01.1972 lindi Eva dhe më 20.05.1977 në kohën që unë isha transferuar në Vlorë lindi Romiri. Në Vlorë punova fillimisht në profilin tim dhe nga viti 1986- 1992 në detyrën e shefit të kuadrit të Divizionit të Vlorës, gjatë kësaj kohe mbarova Shkollën e Lartë të Partisë si dhe provimet pasuniversitare. Më 16.09.1982 lindi Nareda në Vlorë. Me ndryshimet politike që ndodhën u lirova nga ushtria mbas 25 vjetësh si oficer, në vitin 1992 dhe fillova të merrem me aktivitet privat (tregti të materialeve elektrike) të cilën e vazhdoj dhe sot. Me ndryshimet që ndodhën munda te vizitoj Greqinë, Turqinë, Bullgarinë, Italinë, Kosovën, Malin e Zi deri Montekarlon. Në Janar 1998 u shpërngulëm në Tiranë ku vazhdojmë edhe sot.

Enter content here